Mit em velo dür ds Eusass u dür e Jura

Es isch e schicksaushafti wuche für d Schwyz: Dr FC Thun chunnt i d Champions League (u das schrybt e an sech gänzlech fuessbau-unintressierte), viu gebiet gö regurächt im hochwasser unger u dr Aldi und ig ungernäme wider mau e gmeinsami velotour. Zu üsem glück hei mr üs wättermässig eini vo de beschte regione usgsuecht, so dass mr ds gummibootli nid bruche yzpacke ...was auerdings nid söu heisse, dass mr nid nass wärde. Aber dr reie nache:

21.08.2005

(aui aagabe beruhe uf em Wilu sine date)

Es isch nid super wätter, wo mr zu üsere tour ufbräche. Dass mr aber scho nach wenige minute üsi rägechleider müesse aalege hätte mr glych nid dänkt. Churz vor Bellelay beschliesse mr, imene bus-hüsli e suppe z choche. Die wermt chli u isch guet für d schtimmig. När geits wyter, dr hoger abe bis Undervelier. Leider berchöme mr wäge räge u näbu nid viu vo dr vermuetlech rächt schöne schlucht mit über. Dr Wilu het zuesätzlech no mit ere briuue z kämpfe, wo immer mee aalouft. Schliesslech ziet er se in Undervelier ab, wüu er so no es bitzeli besser gseet (wär ne kennt, weis, dass das immer no gnue gfäärlech für sini nöcheri umgäbig isch ;-) ).

Ziemli verrägnet begäbe mr üs z Louffe i ds restaurant Zemp. D chleider wandere zum tröchne i d garderobe u mir hei weni schpeter zwöi täuer mit goudbruner röschti vor üs. Zu üsere grosse überraschig u fröid schpändiert üs d särviertochter am schluss no zwöi sandwiches aus proviant :-).

In Zwinge sueche mr ir dämmerig es plätzli zum ds zäut ufschteue. Mir schiebe üsi velos es schteils waudwägli ufe, ir hoffnig, irgendwo es flachs bödeli z finge. Ds wägli isch schier ändlos, u wo mr ds ändi du glych no hei gfunge, sy mr ufere chrüzig gschtange; hinger üs dr schteil waud, vor üs e huuffe fäuder, näbe üs e schüür. Da chunnt es outo z faare u dr buur wo usschtigt fragt üs, ob mr öpper sueche. Uf üsi antwort, dass mr nid e pärson sueche, sondern es plätzli zum zäutle, git er üs grad drü müglechkeite aa, wo mr üs zum übernachte chöi inschtaliere. Mir wääle die trochnigschti variante u schteue üses zäut imene folieschopf uf. Das isch zwar chli d weicheier-variante, aber derfür hei mr am nächschte morge nid es nasses zäut zum zämeruume.

22.08.2005

Mir ryte no grad chli wyter uf dr weicheier-wäue: Ds ufschta isch extreeeeeem aaschträngend. Dr Aldi chränklet usserdäm chli u het liechts hauswee. Zäme mit em räge isch das gnue grund für üs zum e ruhetag yyzlege. U das nach eim tag faare! We s eso wyter geit, müesse mr us zytgründe wider umcheere, bevor mr überhoupt im Eusass sy aacho.

Was macht me eigentlech, we me e tag lang nüt z tüe het? Zersch mau no chli döse. Gäge mittag toucht dr buur vom vortag uf u ladet üs zum zmittag y. Es git feini nudle mit salat, gchochete rüebli u fleisch. U zum dessert no e schtudänteschnitte :-). A däre schteu no mau es härzlechs MERCI für die tolli gaschtfründschaft! Am namittag vertöörle mr üs d zyt mit türmliboue und mit em geographii-schpili. Seer beliebt uf dr ganze reis isch o es schpili, wo sech dr eint e gägeschtand usdänkt u dr anger mues mit de richtige frage usefinge, wele gägeschtand gsuecht isch.

So ganz zfride sy mr aber glych nid, wüu syt em mittag het sech ds wätter besseret u mängisch schynt sogar d sunne dür d wouche düre. Das wär jo eigentlech ganz guet, nume räntierts jetz nümm würklech, ds zäut abzboue, üses ganze bagage zämezpacke und i nes paar schtunde die ganzi üebig wider dr umgekeert wäg dürezfüeere. Immerhin chöi mr üs ufraffe u wenigschtens mau uf em houpperige waudwägli dr hoger abe rassle und uf emne teerete schträssli wider ufefaare. Dr Wilu ziet sech när no gschwing es fäudwägli yne. Aso eigentlech nume öppe 50meter. Aber die hei s in sech: Dr ungergrund isch so richtig schön rütschig, blybt aber glychzytig ou wunderbar am velo hange. Drum isch churz druf abe e putzakzion aagseit. O dr Aldi mechet a sim velo ume u befreit d brämschlötz vo aluschpän (es isch aso würklech nötig gsy!).

23.08.2005

Eigentlech hei mr jo partout nid dür ds zäntrum vo Basu wöue faare. U natürlech lande mr schlussändlech genau dört... Mir beröies s aber nid, wüu üs d ambiance guet gfaut. Dr Ryy isch wäge de unwätter ockerfarbig u füert rächt viiu schwemmhouz mit sech. Vergliche mit dr Zäntrauschwyz isch er aber no ziemli harmlos - är ma ämu no nid über d ufer.

Irgendwie isch es scho es komischs gfüeu, we me "zmizt ir schtadt" e gränzübergang passiert. U me merkt sofort es paar ungerschide. Nid nume, dass es viu mee reklame het und aues uf französisch aagschribe isch. O d piktogramm sy uf ds mau ganz angers aus me s gwöönt isch... Dr Aldi het sech scho lang uf d Ryyäbeni gfröit. Jetz isch si da, u är het immer no fröid. Am Wilu syni begeischterig faut chlyner us, aber o är fingt s eigentlech rächt gmüetlech, dohie. Es git ziemli viu induschtriiruine, wo irgendwie iire reiz hei. U we me när z Barteheim so ne kreisu gseet, de isch klar: Die lüt wüsse, was säubschtironii isch.

Nach Sierentz ässe mr uf emne fäudwäg zmittag. Dr Wilu isch no am ypacke vom chochzüg, wo dr Aldi scho ume losfaart. Wüu er eigentlech schneuer würd faare aus dr Wilu hei mr verybart, dass er jetz scho chli früecher schiebt u mau so richtig cha böre. In Rixheim wei mr üs ume träffe. Das schaffe mr schlussändlech ou, auerdings nid grad uf aahieb. Mir müesse üs nämlech zersch no a die französischi signaugäbig gwööne. So zweigt dr Wilu nach Eschentzwiller ab u merkt ersch churz vor em dorfaafang, dass er nümm ganz uf dr richtige schpur isch. Derfür isch er im gägesatz zum Aldi grad vo aafang aa misstrouisch, wo dr wägwyser vore umleittig i die gfüueusmässig fautschi richtig zeigt. Ds fazit isch klar: mir faare künftig nach em motto "immer dr nase naa" ;-)

Wüu mr nid auzu viu zyt hei, umfaare mr Mulhouse südlech (u das mou glingt s üs ou). Bi Illfurth gits no chli diskussione, wo s düre geit, u vo wo mr überhoupt sy cho, doch när geits wyter uf emne wunderschöne, praktisch vercheerslose schträssli. Churz nach Heidwiller zweige mr i waud ab, wo mr üses zäut ufschteue. No gschwing es bettmümpfeli ineschiebe ...hei mr dänkt. Schlussändlech lääre mr jede e ganze liter miuch hingere u hoffe, dass mr ir nacht nid uf d toilette müesse. U am nächschte morge gits haut wider mou kondänsmiuch...

24.08.2005

Am vormittag geits entlang vom Canal du Rhône au Rhin uf Dannemarie, wo mr wider mau imene "Super U" ychouffe. Nachdäm mr no öppis hei gässe, geit d fart wyter richtig Suarce. Mir chöme jetz langsam i nes gebiet mit viune chlyne tümple. Uf das het sech dr Wilu am meischte gfröit. U so isch es o nid erschtuundlech, dass mr ds zmittagässe am ufer vomene wunderschöne tümpu zwüsche Suarce und Faverois zuebereite. Nach em choche verbringe mr no rächt viu zyt dörthie u hange eifach chli ume. Das heisst, dr Aldi hanget ume - dr Wilu pirscht sech mit em fötteler a libäuene u höigümpper ane.

Via Delle und Beaucourt faare mr am namittag nach Audincourt. Wo mr dört aachöme isch es scho wider ässenszyt. Das mou lö mr üs inere pizzeria lo verchöschtige. När lö mr d liechter vo dere schtadt am Doubs hinger üs u kämpfe üs bim ydunkle e relativ länge aaschtig ufe. Es isch eifach zfride ...fingt vorauem dr Wilu, wo sech drüber fröit, dass es jetz ume i d höger geit.

Eigentlech hei mr ds zäut no vor dr gränze wöue ufschteue. Wüu mr aber ke geignete platz finge faare mr du glych scho a däm aabe i d Schwyz. Nach Fahy biege mr linggs ab u versueche üses glück imene waudschtück. Z fuess erkundige mr zersch mau ds terrain. Wo mr öppis hei gfunge, blybt dr Wilu a däre schteu schta u dr Aldi hout sys velo. Plötzlech ghöre mr rächt ydrückliche motorelärm u zwüschine mau eine wo umemöögget. Dr Wilu erinneret das schtarch a ds militär, was üs derzue bewegt, es angers plätzli z sueche wo chli ruhiger isch. Das finge mr de schpeter tatsächlech. Ooni es einzigs motoregrüsch z ghöre schteue mr üses zäut uf und gö go schlafe. Da lige mr auso zfride i de penntütene u wei so langsam i ds rych vo de tröim entschwäbe, wo uf ds mau dr gross chrieg schynt uszbräche. Me ghört d schüss vo gweer u vo grössere kaliber, die ganzi nacht lang...

25.08.2005

Guet erhout wache mr am nächschte morge uf und hei o grad e bsuecher. Wärend dr aut maa erschtuunt isch, dass öpper sys zäut hie ufschteut, schtuune mir, dass sech öpper i dä hässlech fichteforscht verlüürt. E schrege aafang vomne schrege tag. U es geit grad wyter: Bim zämepacke gheit mr mis velo zwöi mou um u derby verabschidet sech dr rückschpiegu definitiv. Ämu fasch definitiv. Mit gwäbchläbband (oder erkka, wie dr finn seit) cha me d überräschte so fixiere, dass dr schpiegu no es zytli bruchbar blybt. U wie mr aui wüsse, het nüt so guet wie nes provisorium. Zrügg uf dr houptschtrass gse mr übrigens d ursach vo dr nächtliche ballerei: Mir sy sozsäge vis-à-vis vom waffeplatz go zäutle.

Mir faare abe nach Porrentruy. Dört chouffe mr aasichtschartene u inschtaliere üs am baanhof, wo mr e huuffe zyt mit charte schrybe verbrate. Es dünkt üs, es heigi cheibe viu jugendlechi, wo iiri zyt mit umehange verbringe. Es isch zuegänermasse rächt aaschteckend... Obwou d wätterprognose nid schlächt wäre, faat s afo schiffe. Hocherfröit lege mr auso wider mau üsi rägechleider aa, bevor mr ume losfaare. Momänt, zersch gö mr natürlech no go ychouffe, ässe zmittag u hange no chli ume. Schliesslech sy mr jo z Porrentruy.

Es schiffet auso immer no, wo mr d wyterfaart aaträtte. U winde tuets o no. Das längt aber no nid, nach Cornol erwartet üs e rächti schtygig. Ämu mit üsem gepäck sy die 10% nid grad es zuckerschläcke. Bi Malcôte schtreikt dr freilouf vom Aldi sym velo no gschwing. Das heisst, d cassette dräit wyter, o we dr Aldi mit pedale ufhört. Das problem leit sech aber nach churzer zyt vo säuber wider. U o dr räge laat nache. Leider aber nume für churzi zyt. Da chunnt ds restaurant "La Caquerelle" grad rächt. Obwou mr hüt no nid emau 25km hei zrügg gleit, hocke mr i die warmi schtube u tüe üse hunger schtiue. A de chochkünscht laat sech absolut nüt ussetze.

Wo mr ume use chöme, het sech ds wätter nid veränderet. Schtimmt nid ganz; zum räge gseut sech jetz no dr näbu... Was söu s, irgendwie fründe mr üs demit aa, u o dr gägewind bedütet ke wäutungergang. Mir wei no öppe 10km mache u när es plätzli zum zäutle sueche. U wüu mr haut keis finge faare mr no chli wyter und no chli wyter. Vor landschaft gse mr wägem näbu nid viu, aber das wenige wo mr gse, laat ufene seer schöni gägend lo schliesse. Auerdings isch es würklech es ding vor unmüglechkeit, e gschide platz zum zäutle z finge. Entwäder isch ds gländ viu z schteil, oder de isch es yzüünt. Ungerdesse isch es scho dunku u mir hei ging no nüt gfunge. Bi re längzognige abfart (me het ds gfüeu, me wärdi vom räge im gsicht "sandgschtraalet") schteut dr Aldi es problem bi dr vordere fäuge fescht. Mir befürchte scho, dass si futsch chönnt sy (wär jo nid ds erschte mau), doch zum glück isch es nume e aluschpan, wo sech i d flanke het yneboret. Kes grosses problem.

In Bémont probiere mr üses glück bir jugi. Die het aber scho zue u so faare mr no mau es schtück wyter. Bi Saignelégier biege mr nach linggs ab, richtig südoschte. U weni schpeter finge mr uf dr lingge schtrassesyte e campingplatz. Dört isch zwar o niemer me ar réception, aber mir schteue üses zäut glych uf. Mir mache es zedeli mit em hiwys, dass mr am nächschte morge chöme cho zale. U so geit weni schpeter e tag z änd, wo trotz ungünschtige raamebedingige es highlight vo dere tour isch worde.

26.05.2005

Am morge gö mr natürlech grad go zale. Ds personau isch seer fründlech u mit CHF 8.- für ds zäut u CHF 3.50 pro pärson belaschtet die übernachtig üses budget nid heftig. Verby am Étang de la Gruère (mir haute nid aa, wüu mr nid ds ganze gepäck unbeufsichtiget wei lo schta) faare mr uf Tavannes u när ufe Col du Pierre Pertuis. Dört isch wider mou zyt zum choche. U zwar gits e nöiuflag vo üsere heissgliebte Yulara-pampe (wär nid weis, was das isch, cha mau im Ouschtralie-reisebricht e blick i ds kapitu "Dingos, the red centre und üsi kulinarische höheflüg" wärfe). Jede biss isch e beschtätigung, dass es sech het gloont, dä 2.5kg-sack mit härdöpfu vo Porrentruy bis dohäre z transportiere. Mir gönne üs no es chlyses mittagsschläfli, u näme när die abschliessendi abfart nach Bieu unger d redli.

www.discovertheworld.ch