Mis tröimli vomene velo (e homepage mit relativ viu biuder u relativ weni tegscht)
Reise mit em Velotröimli: Tessin und Eusass
Übrigens: zum d biuder z vergrössere: eifach drufklicke!
Ds Velotröimli, ufgno am 21.apriu 2004 imene bärner waud.
Die erschti faart hei mr zäme im ouguscht 2001 ungerno.
Do het üs dr bärg grüeft. Und zwar dr Gränchebärg. U we dä üs rüeft, de gö mr haut...
Un kilomètre à pied, ça use les souliers...
Dr pneu wird zwar o abgnützt, aber är het eidütig lenger aus mini schue.
Uf dr Grimsu-schtoumuur isch ds Velotröimli o scho gsy. Natürlech nid ooni mi.
OK, i bi chli nes weichei, angeri lüt wäre hie ufe gfaare. Aber schliesslech bini denn i de ferie gsy!
Zwöi wo sech verschtö.
Das biud isch inere schlucht vom Doubs in Frankrych entschtande.
U do gse mr ne no, dr wunderschön, aber leider öitrophiert Doubs.
Mau es biud im winter. Obwou i nid so dr winter-velööler bi, ghört ei tour zu mine grosse favorite: dr Bözingebärg bi schnee. Es isch immer wider e tolli useforderig, die bis zu 15% schteili, verschneiti schtrass z meischtere. Bim ufefaare bewegt me sech zum teil hert ar trakzionsgränze, bim abefaare cha me derfür schier ändlosi brämsschpure zie. Mini lengschti het 250m gmässe! :-)
I ha das velo bis uf schtüür- u trätlager säuber zämebout, u zwar mit fougende komponänte:
|
Komponänte |
Ursprünglech |
Aktuell (nur bi änderige vermerkt) |
Bemerkige |
|
raame und gable: |
Velotraum Cross CrMo 51cm |
||
|
sattuschtützi: |
Kalloy |
||
|
sattu: |
Veloplus Panix |
Veloplus Panix |
dr urschprünglech isch e schiefi mäntigsprodukzion gsy. Jetz isch aber e grade druf |
|
schtüürsatz: |
Dia Compe |
||
|
vorbou: |
X-TAS-Y |
BBB (syt oktober 2004) |
chürzer u schteiler aus dr erscht. Leider sy d schrubene nid roschtfrei - die müesse us däm grund no ersetzt wärde |
|
guidon: |
Alpen Challenge |
||
|
länkergriffe: |
Salsa |
Ergon GP1 |
die grösseri version |
|
hörndli: |
? |
||
|
bräms- und schauthebu-einheit: |
Shimano XT |
besser wäre separati schaut- u brämsheble. Aber i ha die ganzi XT-gruppe aus set gchoufft u ha drum nid chönne usläse | |
|
brämse: |
Shimano XT |
||
brämsgummis: |
Shimano XT |
die schwarze vo Kool Stop |
irgendöppis, nume nid die originale vo Shimano; da gö d fäugene düre wie dr chäs dür ds rybyse! E weicheri mischig verlengeret ds läbe vo de fäuge enorm |
umwärfer: |
Shimano XT. Top swing |
||
|
wächsler: |
Shimano XT |
||
|
pedau: |
Shimano SPD 324 |
es paar urauti vo Suntour |
i ha d clickies nie brucht, drum isch ds kombipedau die weniger gueti lösig gsy |
|
kurble: |
Shimano XT |
||
|
trätlager: |
Shimano XT |
||
chetti: |
Shimano CN-HG93 / XT |
ergänzt mit emne chettischloss (Wippermann conneX) |
bis jetz hani zwöi chettine abwächsligswys in betriib |
|
cassette: |
Shimano XT |
mit 11-32 zään | |
nabe vore: |
Shimano XT |
SON nabedynamo | |
|
nabe hinger: |
Shimano XT |
Shimano XT |
i ha dr freilouf chli vermurggset. Är het ungwöndlechi grüsch vo sech gä, het aber no wyter funkzioniert. Mit de nöie redli hets aber o e nöji nabe gä. |
schpeiche: |
DT Competition |
||
fäugene: |
Ambrosio Quorum |
Alexrims DH22 |
natürlech mit 36 löcher |
|
fäugeband: |
Velox |
|
|
|
schlüüch: |
vore: Schwalbe XXlight 26 x 1.5-1.75 hinger: Hutchinson light |
Schwalbe XXlight 26 x 1.5-2.1 |
|
pneus: |
Semperit Tour live 26 x 1.75 |
Panaracer Pasela TG 26 x 1.75 |
dr Semperit (Continental) het zwar e gringe rouwiderschtand, het bi füechter faarbaan aber kei griff. När hani e Schwalbe Marathon XR druf gha, doch bi däm hei karkassefäde afo rysse u hei es loch i schluuch gmacht. När hani s mit emne Nokian Ultra Tour 2 probiert, aber da het dr hinger nach öppe 7500km e büle brcho. Syt septämber 2007 probierenis mit de Panaracer |
|
dynamohautterig: |
Dynashoe |
nümm nötig |
|
dynamo: |
Busch & Müller Dymotec 6 |
SON nabedynamo |
|
schynwärfer: |
Busch & Müller Lumotec Standard |
die auti, rundi version. Mittlerwyle mit emne 3W-birli, schtatt 2.4W | |
|
rückliecht: |
DToplight plus |
DToplight plus |
im dezämber 2004 isch mr ds erschte dürebrönnt :-( |
gepäcktreger: |
Pletscher Athlete |
Tubus Cargo |
syt em summer 2004 |
schtänder: |
Pletscher Optima |
ou bekannt unger em name ESGE | |
|
schutzbläch: |
Bluemels Olympic |
||
fläschehautter: |
1x Minoura für 1.5l PET-fläschene. 2x Elite Ciussi für bidons |
es würd mi reize, mau säuber e hautter für 1.5l PET-fläschene z mache | |
|
computer: |
CatEye MITY 3 |
dr einzig waar velocompi! | |
|
lütti: |
Bike-Billy |
||
|
neigigsmässer: |
Sky Mounti |
es nätts schpiuzüg, wo mängisch erklärt, werum ds pedale so müesam isch | |
rückschpiegle: |
linggi syte: Mountain Mirrycle rächti syte: - |
linggi syte: Mountain Mirrycle (mittlerwyle zum zwöite mou repariert) rächti syte: früecher mau dr Busch & Müller Cycle Star. Dä het sech aber bimene schturz verabschidet u het nid chönne repariert wärde (dä het äbe plastic-chuguglänk...) |
aus nöchschts sy hautterige us eigeter produkzion mit schpiegle vom Mountain Mirrycle planet |
Bsunderheite ...oder: die chlyne baschteleie vom Wilu
-
Dank emne chlyne schnäuschpanner cha me ds vordere Schutzbläch abmontiere, für e transport vom velo im ne velosack
-
Schiggi väntiudecheli
-
Ir chuchi het me es chuchiradio, im outo es outoradio und am velo ...dänk es veloradio!
-
Dr schynwärfer cha me dank emne schpezielle lampehautter ir höchi verschteue
-
Im waarschte sinn vom wort beruhigend: dr umbou vo dr vorderbräms
-
En aute wunsch, im oktober 2004 ändlech verwürklicht: d inneverlegig vom tachokabu
-
D kabuaaschleg für d schautkabu hei mr nümm so rächt wöue passe. Drum gits jetz nöji
-
E nachbou vo re "Pitlock"-schrube, damit me dr vorbou nid so liecht cha chlaue
-
U zum schluss no diversi angeri sächeli, woni mim Velotröimli ha gönnt
So, u jetz no es paar biudli vo mine baschteleie. Fö mr doch grad aa mit em schigge, chlyne
Es fixes schutzbläch in kombinazion mit ahead-vorbou macht dr transport im velosack fasch unmüglech. Jedes mau we me ds guidon würd schreg schteue, müesst me ds lagerschpiu vom schtüürlager nöi yschteue. D auternative beschteit imene abnämbare schutzbläch. Zu däm zwäck hani mr das chlyne schnäuschpannerli dohie baschtlet.
Wüu d väntiu irgend so nes schregs gwind hei, woni nid säuber cha schnyde, hani aus basis haut e guete aute Presta/Schrader-adapter gno. Däm hani afe mou ds überflüssige materiau abdräit, bis fasch nume no ds gwind isch übrig blibe. Aus nächschts hani d "ussehüue" us alu gmacht. Die beide teili sy am schluss mitenang verbunde worde, und zwar -wän wunderets?- mit Araldite. U das het.
Ds alu hani am aafang eifach mit ere klarlagg-schicht überzoge gha, damit s nid so empfindlech uf chratzer isch. Aber irgendwenn hani roti decheli wöue u wüu i grad ke rote lagg zur hand ha gha, hani haut wasserfeschte fiuzschtift brucht. Wüu die farb aber het afo usbleiche, hani du glych richtige lagg müesse druf tue. Dr metallic-effekt isch jetz zwar wäg, aber derfür passt d farb besser zu dere vom velo :-)
Mis Veloradio...
Das heisst, afe mau d hautterig. Es isch en auti hautterig vomene dioderückliecht. Ds liechtli isch mr gmugget worde u d hautterig isch sider nutzlos am velo blibe.
U juscht wo sech d idee vom veloradio het i mim chopf ygnischtet, hani die unnützi hautterig ändlech mau wöue abschrube.
Doch da hets i mim oberschtübli "klick" gmacht, u anschtatt säuber e befeschtigung für ds radiöli z mache, hani eifach die auti hautterig überno u es passends gägeschtück aagfertiget.
So loot sech ds radiöli perfekt am satturoor befeschtige u ganz schnäu wider abhänke.
U so gseet das vo vore, ääää vo hinger us. Ds radiöli isch übrigens es chinesischs qualitätsprodukt ;-)
U das isch mi pärsöndlech favorit: e lampehautter, wo me cha verschteue.
Schpiuzüg? Genau, schpiuzüg.
Aber eis mit emne praktische nutze. So loot sech nämlech d uslüüchtig vor faarbaan ganz eifach dr gschwindigkeit u de schtrasseverhäutnis aapasse. Uf däm biud gseet me d urversion.
Mittlerwyle sy d provisorie vo dr befeschtigung dür eleganteri lösige ersetzt worde, aber am hautter säuber hani nüt gänderet.
D schwirigkeit bir härschteuig isch vorauem gsy, dass die ganzi gschicht söu verschteubar sy, aber trotzdäm nid z viu schpiu darf ha. Wüu wär wott scho e schynwärfer, wo umewaggelet?
Uf däm biud isch übrigens o dr bereits vorgschteut schnäuschpanner für ds schutzbläch z gse.
Modifizierti vorderbräms
A dere schteu wetti aus erschts grad e disclaimer aabringe:
D brämse sy waarschyndlech die wichtigschte teili am velo. Si sy für öji sicherheit vo zäntraler bedütig. Das giut ganz bsungers für d vorderbräms. Drum isch es grundsätzlech ke gueti idee, da dran umezbaschtle u i rate nech drum o i auer form dervo ab, die hie zeigte modifikazione nachezmache. I leene jeglechi haftig für materielli u gsundheitlechi schäde vo jedere art ab. Usserdäm erlöscht dür söttigi veränderige vor bräms jeglechi garantii vom härschteuer. D verantwortig für öies handle traget eleini dir.
So, jetz wo das mau gseit wär, chöme mr langsam zur sach. Da i mi nid gärn mit frömde fädere schmücke, wetti zersch grad mou druf hiwyse, dass dä umbou nid uf mim mischt isch gwachse. I ha mi lediglich a d aaleitig uf www.nobrakes.de ghaute. Hie isch e diräkte link derzue.
Ds problem bir vordere v-brake isch, churz gseit, dass dr brämschlotz am fautsche ort isch aagmacht. Us sicht vor rotierende fäuge sött dr chlotz nid vor, sondern hinger em brämsarm lige. Werum das so isch, cha me uf www.nobrakes.de nacheläse.
Me mues für die planeti modifikazion d brämschlotz-ufnaam vom rächte und lingge arm vertuusche. Das geit nume, we me dr hie zeigt schtift entfernt. U das widerume geit nur, we me dr chopf vom schtift abfielet.
...oder abfreeset, so wien ig dohie. Wäge däre irreversible veränderig hani mi drü jaar lang nid derfür gha, mire bräms ds muu z schtopfe ...Bis i mr die sach genauer ha aagluegt u ha gmerkt, dass dr schtift trotz fäälendem chopf nid cha userütsche. Är wird nämlech uf dr angere syte vom veloraame gsicheret.
Trotz dere sicherig chönnt dr schtift theoretisch no öppe 1.5mm umerütsche. Aber nume theoretisch. Wüu erschtens isch dr schtift so genau gfertiget, dass er guet chlemmt. U zwöitens hani mr us messing no es hüuseli gmacht, so dass dr schtift sech jetz nid emau me theoretisch cha verschiebe.
So gseets nach em umbou us. D fädere het no chli müesse zrächt boge wärde.
Die modifikazion hani am 13.10.2004 vorgno, u syt däm tag het mini vorderbräms kes einzigs mau me quiitschet. Am aafang hets mi dünkt, d brämsleischtig sigi liecht zrügg gange. Aber mittlerwyle bini dr uffassig, dass mini bräms no nie so guet (und liislig!!!) isch gange :-)
Ei nachteil het die sach auerdings: i mues mi jetz wider mit em lüütti bemerkbar mache...
Inneverlegig vom tachokabu
Blick vo voore uf ds guidon: rächts im vordergrund gseet me d hautterig vor länkertäsche. Ds kabeli vom tacho geit dere hautterig entlang abe...
...u geit när unger dr hautterig düre. Ds kabu wird hinger dr schrube vor guidonchlemmig düre gfüert.
Wyter geits am vorbou entlang.
Hinger em vorbou geits när ume ufe, natürlech widerume hinger de schrubene verschteckt. Wüu dr vorbou chli höcher ufe chunnt aus dr gabuschaft, hets obe e lücke vo 4-5mm. Auso lengschtens gnue platz zum ds kabeli dürezfüere.
Guet verschteckt wärde d kabeli när düre gabuschaft u schliesslech dr gable entlang gäg abe zoge.
We me dr dechu wäg nimmt, gseets so us. Damit me dr ganz vorbou bi bedarf cha wägnä, hani schteckerli ybout.
D originaukabu vom velocompi sy übrigens leider chli z churz gsy, so dass i se ha müesse verlengere. Aber we me so guet cha löötte wien ig, duuret das jo nur öppe drü viertuschtunde......
Nöji schautkabuaaschleg
Uf däm biud gseet me die aute aaschleg für d schautkabu. Wie me gseet, handlet sechs derby um alu-schrubene, wo d fiinyschteuig vo umwärfer und wächsler erloube. Das isch guet u rächt, aber völlig überflüssig, wüus söttigi schteuschrubene scho a de schauttige het. Usserdäm hei sech die schrubene dür d beaschpruchig verboge, so dass me se ee nümm rächt het chönne dräie.
Darum hani mr e kompakteri u hübscheri auternative gmacht. Äbefaus us alu. Verbiege wird sech aber nüt, wüu d belaschtig übere chopf diräkt uf ds aalötteili übertreit wird.
Damit dr glanz nid grad wider verlore geit, hani e schicht klarlagg drüber gä.
D redli hani scho syt langem mit "Pitlock" gsicheret. Die muettere hei e schpezieui form u drum cha me se (fasch) nume mit em derzueghörige wärchzüg uftue. Für e Ahead-vorbou hani ke söttigi sicherig gha, so dass me dä mit emne normale inbusschlüssu hätt chönne löse u när die ganzi gable hätt chönne chlaue. U wüu das "Pitlock"-züg so tüür isch zum chouffe hani die sicherheitslücke dür ne nachbou gfüut. Dr dechu het natürlech o müesse ersetzt wärde, wüu dr nöi schrubechopf dütlech grösser isch aus dä vor aute schrube.
Das isch dr versuech, öppis gäge chain sucks z ungernä. E verdräckti oder schlächt göleti chetti cha uf em zaanchranz blybe hocke u sech när zwüsche zaanchranz u raame verchlemme. So isch dr bishär einzig roschtfläck am ganze raame entschtange.
Hie no en angeri perschpektive. We d chetti blybt hocke, wird si dür d yseplatte vom zaanchranz abgschtreift.
Leider funkzioniert das konschtrukt aber nid zur voue zfrideheit, wüu i mi scho bir planig ha verschetzt u wüu sech d yseplatte mit dr zyt het verboge. Aber es isch geng no besser aus nüt, denn d chetti cha sech nume i usnaamefäu verchlemme.
Leider het dr nöi gepäcktreger kei fäderklappe. Us däm grund chani ds schloss nümm feschtchlemme. Drum hani mr klettband am meter gchoufft, u mit däm drü bänder gmacht, wo fix am treger sy aagnäit. So cha ds schloss rüttufrei befeschtiget wärde. Weni sacochene derby ha, chunnts natürlech dört dry.
Zwöi nachteile: ds aa- und abmache duuret relativ lang und bim faare cha schtoub u wasser i ds schlüssuloch cho. Da schafft es schtück vomne aute schluuch abhiuf (nid uf em biud).
Im handu sy diversi spacer erhäutlech. I ha mr zersch es provisorium us messing gmacht. Nach drü jaar isch es mr definitiv z hässlech worde, u so hani mr es paar nöji spacer us alu dräit. Si passe schön konzäntrisch ufenang, so dass ds türmli bouzgrad isch. Leider gseet me immer wider velos mit sytlech versetzte spacer, was doch eher unsuber usgseet.
Das alu-ding, wo gäg rächts ufe luegt, isch dr ersatz für e plastic-clip vom schutzbläch, wo einisch bim verfrachte im zug isch abbroche.
Im originauzueschtand hets bir hingerradachse zwöi dischtanzringe, wo glychzytig o d dichtig (hie nid montiert) ufnäme. Die sy nid grad bsungers präziis gfertiget, u o ke wooutat für d ouge. Drum hani mr säuber passende ersatz gmacht. Sicher nid nötig, aber nätt.
Hie isch nöi und aut näbenang z gse.
Leider sy d gwindösene für d fläschehautter bim Velotröimli nid optimau aagordnet. Drum hani chli müesse nachehäuffe. Im biud gseet me dr 1.5l PET-fläschehautter, woni mit ere teppichleischte ha ufe versetzt. Dr chly bidonhautter, wo me rächts im biud gseet hani nach em glyche prinzip aber mit emne schlankere alu-profiu gäge abe versetzt.
Ds rückliechtli wird mit zwöine schrube am gepäcktreger aagmacht. Die sy auerdings lenger aus nötig und usserdäm sy si nid roschtfrei. Drum hani mr us alu es paar nöji gmacht. Im vordergrund e nöji, im hingergrund en auti schrube.
U do wär no dr link zu mire wärchzügroue
